مشجعين ريال وبرشا ادخلووو

مراحب يالغوالي

اليوم الجمعه كنت معزوم على الغدا عند واحد من الربع

وكانت الجلسة اغلبها شبابية
فجاة ابتدى الشباب يتكلمون عن الدوري الاسباني وتحديدا عن
برشلونة وريال مدريد عملاقي الدوري الاسباني واشهر الاندية الاوربية .
طبعا كان الحضور مقسم الى مشجعين لبرشلونه وقسم أخر يشجع
ريال مدريد . وابتدى التحدي والمزايدة وكل واحد منهم يرفع بفريقه
ويخفس بالفريق الثاني الارض . ومن باب المعانده صار كل واحد منهم
يألف قصه يضحّك فيها الحضور ويذم فيها الفريق المنافس ومشجعينه .
واحد من اللي يشجعون برشلونه قال
اعرف واحد حط شعار ريال مدريد على سيارته ويوم قام الصبح
يشغل السيارة ما اشتغلت
رد عليه أخر يشجع ريال مدريد وقال
واحد راح يصلح سيارته عند كراج وطلب من الفني انه يستعجل فيها
لانه بيروح يحضر مباراة بين برشلونه وريال مدريد
فسأله الفني مين برشلونه ومين ريال مدريد ؟
يقول فأخذه الحماس وصار يكلمه عن الفريقين لكن كان يفخّم
ويمدح بالريال ويذم برشلونه وانه الريال فريق عريق وله انجازات
وفيه لاعبين بملايين الدولارات وانه الريال يصنع الفرجه ويسجل الاهداف
يقول حس صاحبنا وهو يكلم الفني كأنه بيضيف مشجع اخر اضافي للفريق الملكي
ولما خلص الفني من تصليح السيارة قام صاحبنا واعطى رقمه للفني
علشان يعطيه اخراخبار وموعد مباريات فريقه الغالي ريال مدريد
وبعدها قام الفني ايضا واعطى صاحبنا كرت الكراج الخاص فيه
ولما طالع الكرت لقى اسم الكراج ( كراج برشلونه ) .
استمر الكلام وبطريقه حاده بين الطرفين وكل واحد يقول للأخر
راح نكسر روسكم والاخر يرد عليه ويقول برّد خسارتكم قدام
الفريق الفلاني اللي فاز عليكم بملعبكم .
المهم استمر الطرفين وكل واحد منهم مستميت بالدفاع عن فريقه ويذم
الفريق الثاني كل هذا وانا ساكت وماتصدقون لو قلت لكم انه الحديث
عن الفريقين ابتدى اول ما ابتدينا نتغدى بالضبط .
ولما حسيت انه مابقى شي يقولونه قلت لهم وانا أضحك
تدرون انكم عجبتوني ؟؟
قالوا كيف عجبناك ؟ قلت زين منكم والله انكم جالسين على
سفرة وصينيه وحدة مع انه كل واحد منكم يشجع فريق غير
ولو انا بمكانكم ماكنت أرضى أجلس مع ( عدو وخصم ) منافس مهما يكون !!
طبعا بغض النظر عن الاعتبارات الاخرى ومع درايتي بمستوى الفريقين
وحلاوة لعبهم والاستمتاع الكبير اللي يعيشه المشاهدين والمتابعين ومع
علمي بشغف القلوب كلٌ حسبما يهوى ايلا اني استغرب هذي المناقشات
المتأزمه اللي تحصل بين المشجعين حتى لو كانوا اخوان وابناء عمومه لدرجه
انهم ممكن يزعلون ويخسرون بعض من اجل اشخاص وفرق يجب
أن يكون لنا قدوة في غيرهم من أهل الصلاح والتقوى ولامانع من متابعة
المباريات طالما بقيت الامور بحدود المعقول والمقبول ولست أفتي بهذا .
عذرا على الاطالة ولكن
أحب أن أضيف هذه المناقشه اللي حصلت بالفعل بين طفلتين
فاطمه تسأل مروى : انت تشجعين ريال مدريد ولا برشلونه ؟
مروى ترد على فاطمه وتقول ماأدري
فاطمه : شوفي اذا تشجعين ريال مدريد راح تكرهك ايمان
واذا تشجعين برشلونه راح تكرهك عبير
واذا تشجعين الفريقين راح تكرهك يسرى لانها تكره الفريقين اثنينهم !!
مروى رجعت تسأل فاطمه أجل أيش أعمل ؟
ردت عليها فاطمه وقالت لاتشجعي ولا واحد منهم أريح لراسك .
أعتقد كلام الطفله فاطمه هو عين العقل
طبعا منقول وانا ريالي ههههههههههههههههه هادا جبتو علشان تضحكو